ᐃᓕᑕᖅᓯᓂᖅ & ᐊᑐᖅᑐᑦ ᖃᐅᔨᒪᔭᑦ

ᐃᓕᑕᖅᓯᓂᖅ ᓯᕕᑐᔪᒥᒃ ᑕᐅᑐᖕᓂᖃᖅᐳᖅ ᐊᑐᖅᑐᑦ ᖃᐅᔨᒪᔭᑦ ᑭᓲᓂᖏᓐᓂᒃ, ᖃᓄᕐᓗ ᐊᑐᖅᑕᐅᔪᓐᓇᕐᒫᖔᑕ. ᐅᕙᑦᑎᓐᓄᑦ, ᐅᖃᒫᕈᓐᓇᕐᓂᖅ ᑎᑎᕋᕈᓐᓇᕐᓂᕐᓗ ᐅᖃᓕᒫᕐᓂᑐᐃᓐᓇᐅᙱᑦᑐᖅ, ᑎᑎᕋᕐᓂᑐᐃᓐᓇᐅᙱᖦᖢᓂ ᐊᒻᒪᓗ ᐸᐃᑉᐹᓕᕆᑐᐃᓐᓇᐅᙱᑦᑐᖅ−ᐱᔾᔪᑎᓕᒃ “ᑕᑯᓪᓗᓂ ᑕᑯᔭᒥᓂᓪᓗ ᖃᐅᔨᒪᓪᓗᓂ.” ᐃᓄᐃᑦ ᐊᑐᖅᑐᑦ ᖃᐅᔨᒪᔭᖏᑦ ᐊᒻᒪᓗ ᐱᑕᖃᕆᐊᓖᑦ ᐱᔪᓐᓇᕐᓂᕆᔭᑦ ᐊᑐᕐᓂᖃᑦᑎᐊᖅᐳᖅ ᐃᓄᐃᑦ ᐃᓕᑉᐸᓪᓕᐊᔾᔪᓯᕆᕙᒃᑕᖏᓐᓂᒃ ᐊᑐᓕᖅᑎᑕᐅᓂᖏᑎᒍᑦ ᐅᔾᔨᖅᓱᕐᓂᖅ, ᖃᓄᐃᓕᐅᕐᓂᒃᑯᑦ ᐃᓕᓐᓂᐊᕐᓂᖅ ᐊᒻᒪᓗ ᐅᓂᒃᑳᖅᑐᐊᕐᓂᖅ ᐃᓕᓐᓂᐊᑕᐅᖅᕙᓪᓕᐊᓂᐅᔪᓄᑦ.

ᓄᓇᕗᒻᒥ ᐱᔾᔪᑎᒋᓪᓗᒍ ᐊᔾᔨᒋᔭᐅᓇᓂ ᐃᓕᖅᑯᓕᕆᓂᖅ, ᐊᑐᖅᑐᑦ ᖃᐅᔨᒪᔭᕐᓄᑦ ᐃᓚᒋᔭᐅᔪᓐᓇᖅᑐᑦ:

  • ᐃᓐᓇᒻᒪᕆᒃ ᐃᓄᐃᑦ ᐅᖃᐅᓯᖓᓐᓂᒃ ᐊᑐᖅᑐᖅ ᐅᓂᒃᑳᖅᑐᐊᕐᓂᕐᒧᑦ ᓄᑕᖅᑲᓄᑦ ᐃᓕᓐᓂᐊᕐᕕᖕᒥ.
  • ᐊᑖᑕᑦᑎᐊᕆᔭᐅᔪᖅ ᐃᓕᓐᓂᐊᖅᑎᑦᑎᔪᖅ ᐃᕐᖑᑕᕐᒥᓂᒃ ᐊᓯᐅᑦᑕᐃᓕᓂᕐᒥᒃ ᐅᔾᔨᖅᓱᕐᓂᒃᑯᑦ ᓄᓇᒥᒃ ᓯᓚᒥᒡᓗ.
  • ᓄᓇᓕᖕᒥᐅᑕᖅ ᑎᑎᕋᖅᑐᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᓄᓇᓕᖕᒥᐅᓄᑦ ᐱᒻᒪᕆᔫᑉ ᒥᒃᓵᓄᑦ.
  • ᐃᓐᓇᖅ ᐊᓐᓄᕌᕐᒥᒃ ᓈᒻᒪᒃᓯᒋᐊᖅᑎᑦᑎᔪᖅ ᐊᖏᑎᒋᓂᖓᒍᑦ.
  • ᒪᒃᑯᒃᑐᖅ ᐊᑐᖅᑐᖅ ᑕᒻᒪᕇᒃᑯᑎᒥᒃ.
  • ᒪᒃᑯᒃᑐᖅ ᐊᖑᓇᓱᒃᑎ ᐆᑦᑐᖅᑐᖅ ᐊᒻᒪᓗ ᓴᓇᓪᓗᓂ ᓴᒃᑯᒥᒃ.

ᐃᓕᑕᖅᓯᓂᖅ ᓇᓗᓇᐃᖅᓯᓯᒪᔪᖅ ᐅᑯᓂᖓ ᐱᔪᓐᓇᕐᓂᐅᔪᓂᒃ ᐱᑕᖃᕆᐊᖃᕐᓂᖏᓐᓂᒃ ᐃᓅᓯᖃᕐᓂᕐᒧᑦ ᓄᓇᕗᒻᒥ:

  • ᐃᓄᐃᑦ ᖃᐅᔨᒪᔭᑐᖃᖏᑦ / ᖃᐅᔨᒪ/ᑐᖃᕆᔭᑦ
  • ᐱᓕᒻᒪᒃᓴᕐᓂᖅ / ᑐᕌᕆᔭᐅᔪᑦ ᐱᔪᓐᓇᕐᓃᑦ ᐱᓇᓱᐃᓐᓇᕐᓂᒃᑯᑦ
  • ᐱᔪᓐᓇᐅᑎᑖᖅᐹᓪᓕᖅᓯᒪᓕᖅᑐᑦ / ᓇᓗᖅᑯᑎᙱᑦᑐᖅ ᐊᔪᙱᑕᒥᓃᙶᖅᑐᓂ
  • ᐱᓕᕆᖃᑎᒌᓐᓂᖅ / ᐃᖅᑲᓇᐃᔭᖃᑎᒌᖕᓂᖅ
  • ᐅᖃᖃᑎᒌᒍᓐᓇᑦᑎᐊᕐᓂᖅ / ᑐᓴᐅᒪᑎᑦᑎᔪᓐᓇᕐᓂᖅ ᓈᓚᒍᓐᓇᕐᓂᕐᓗ
  • ᐃᓅᖃᑎᒌᑦᓯᐊᕐᓂᖅ / ᑲᑎᙶᖃᑎᒌᒃᑐᐃᓐᓇᐅᓂᖅ
  • ᐃᓄᙳᐃᓂᖅ / ᐊᔪᙱᑦᑑᓕᕐᓂᖅ, ᒪᒥᓴᕐᓂᖅ ᐊᒻᒪᓗ ᐃᓅᓯᕐᒥ ᐱᔪᓐᓇᕐᓃᑦ
  • ᐃᓕᑉᐸᓪᓕᐊᖏᓐᓇᕐᓂᖅ / ᐃᓚᐅᖃᑕᐅᓂᖅ ᐃᓅᓯᓕᒃᑖᕐᒥ ᐃᓕᑉᐸᓪᓕᐊᓂᕐᒥᒃ