ᐱᓕᕆᐊᕗᑦ

ᐃᓕᑕᖅᓯᓂᖅ ᐃᓄᒃᑎᒍᑦ−ᖃᓄᖅᑑᖅᓯᒪᓂᖅ ᐊᐅᓚᓂᖃᖅᑐᖅ ᐃᓚᐅᓂᖃᖅᑎᑕᐅᓪᓗᓂ ᑕᒪᐃᓐᓂ ᐃᓕᓐᓂᐊᕋᒃᓴᑦᑎᓐᓂ ᐱᓕᕆᐊᕐᓂᒃ. ᐊᑦᑕᓇᙱᑦᑐᓂᑦ ᐱᕕᖃᖅᑎᑦᑎᓲᖑᕗᒍᑦ ᒪᒥᓴᕐᓂᖅ ᐊᒻᒪᓗ ᐃᓕᓐᓂᐊᕐᓂᖅ ᐊᑕᐅᑦᑎᒃᑰᖅᑎᓲᕆᓪᓗᑎᒍᑦ ᐊᒻᒪᓗ ᑲᓱᖅᓯᒪᓂᖅ ᐊᒻᒪᓗ ᐃᓅᖃᑎᒌᓐᓂᖅ ᐊᑕᐅᑦᑎᒃᑰᓲᖑᒻᒥᒻᒪᑦ, ᐃᓕᖅᑯᓯᕗᑦ ᐊᒻᒪᓗ ᓄᓇ ᓄᑖᕐᒥᒃ ᐱᕙᓪᓕᐊᓂᖃᓕᕈᓐᓇᓕᖅᑐᑎᑦ. ᐃᓕᓐᓂᐊᖅᑐᑦ ᐃᓕᒍᓐᓇᓲᑦ ᐊᔪᕐᓂᕆᔭᖏᓐᓂᒃ ᐱᕕᖃᖅᑎᑕᐅᓚᐅᖅᓯᒪᑎᓐᓇᒋᑦ ᐊᔪᕈᓐᓃᕐᓗᓂᒋᑦ. ᑐᙵᓇᕐᓂᒃᑯᑦ ᐊᒻᒪᓗ ᐃᑉᐱᒍᓱᑦᑎᐊᕐᓂᒃᑯᑦ, ᐃᓄᐃᑦ ᐃᖅᑲᓇᐃᔭᖅᑏᑦ ᐊᒻᒪᓗ ᐊᓐᓇᒻᒪᕇᑦ ᑐᒧᐊᑦᑎᑦᑎᓲᑦ ᐃᓕᓐᓂᐊᖅᑎᓂᑦ ᐱᕚᓪᓕ(ᒃᑲᓐᓂ)ᓕᖁᓪᓗᒋᑦ ᐊᔪᙱᓐᓂᖏᑦ ᐊᒻᒪᓗ ᓇᓗᖅᑯᑎᒍᓐᓃᕐᓗᑎᑦ, ᐅᐸᓗᖓᐃᓯᖅᒪᑦᑎᐊᕐᓂᐊᕐᒪᑕ ᑲᒪᐃᓐᓇᕐᓗᑎᑦ ᐃᑉᐱᒍᓱᑦᑎᐊᕐᓗᑎᓪᓗ ᐃᓚᒥᓂᒃ ᐊᒻᒪᓗ ᓄᓇᓕᖓᓂᒃ. ᐃᓕᓐᓂᐊᖅᑐᑦ ᐃᑲᔪᖅᑐᖅᑕᐅᓲᑦ ᓇᖕᒥᓂᖅ ᐊᑐᖅᐸᓪᓕᐊᔭᖏᖕᓂᒃ ᐃᓕᓐᓂᐊᖅᑎᓪᓗᒋᑦ, ᓇᖕᒥᓂᖅ ᖃᐅᔨᑎᓪᓗᒋᑦ ᐊᒻᒪᓗ ᑭᓇᐅᓂᕐᒥᓂᒃ ᖃᐅᔨᓪᓕᐊᑎᓪᓗᒋᑦ, ᐊᒻᒪᓗ ᐱᔪᓐᓇᖅᓯᑎᑕᐅᓯᒪᓂᐊᕐᒪᑕ ᐃᓅᓯᕐᒥᒃ ᐊᑐᖅᑕᒥᓂᒃ ᐱᕙᓪᓕᐊᓂᖃᒃᑲᓐᓂᓕᕐᓗᑎᑦ.

ᐃᓄᐃᑦ ᐃᓕᓐᓂᐊᕈᓯᖏᑦ ᐊᔾᔨᒋᙱᒻᒪᔾᔪᒃ ᖃᓪᓗᓈᑦ ᑲᒪᒋᔭᖃᕆᐊᕐᓂᖏᖕᓂᒃ ᐃᓕᓐᓂᐊᕐᓂᕐᒥᒃ ᐊᒻᒪᓗ ᐃᓕᓐᓂᐊᖅᑎᑦᑎᓂᕐᒥᒃ. ᐃᓕᑕᖅᓯᓂᖅ ᐃᓕᓐᓂᐊᕋᒃᓴᖏᑦ ᐃᓴᒃᓯᒪᓲᑦ ᑕᐅᑐᓐᓂᕐᒥᒃ, ᐊᒡᒐᓂᑦ ᐊᑐᕐᓗᑎᑦ ᐆᑦᑐᕋᕐᓗᑎᑦ ᐃᓕᓐᓂᐊᕐᓂᕐᒥᒃ ᐊᒻᒪᓗ ᐅᓂᒃᑳᖅᑐᐊᕐᓂᕐᒥᒃ. ᑕᐃᒪᐃᑦᑎᓪᓗᒋᑦ, ᖃᐅᔨᓇᓱᓲᖑᔪᒍᑦ ᐋᖅᑭᒃᓱᒃᑲᓐᓂᕋᓱᐊᖅᑐᒋᑦ ᐱᖅᑯᓯᑐᖃᕗᑦ ᖃᐅᔨᒪᓂᕐᒥᒃ ᐃᓕᓐᓂᐊᖅᑎᑦᑎᒍᓯᑐᖃᕐᒥᒃ. ᑭᒃᑯᓕᒫᑦ ᐃᓚᐅᖃᑕᐅᓪᓗᑎᑦ, ᐃᓕᓴᐃᔨᐅᒐᓗᐊᕈᓂ ᐃᓕᓐᓂᐊᖅᑎᐅᒐᓗᐊᕈᓂᓘᓐᓃᑦ, ᐃᓕᓐᓂᐊᖅᑎᑦᑎᒍᓐᓇᖅᑐᐃᓐᓇᐅᒻᒪᑕ ᐊᒻᒪᓗ ᐃᓕᓐᓂᐊᕈᓐᓇᖅᑐᑎᑦ. ᐃᖅᑲᓇᐃᔭᖃᑎᒌᓲᑦ ᓇᓗᓇᐃᖅᓯᖁᓪᓗᒋᑦ ᑎᑭᓐᓇᓱᐊᖅᑕᒥᓂᒃ ᐊᒻᒪᓗ ᖃᐅᔨᓴᕐᓗᑎᑦ ᓇᖕᒥᓂᖅ ᐱᕙᓪᓕᐊᓂᕆᔭᖏᖕᓂᒃ ᐊᒻᒪᓗ ᑲᔪᓯᓂᖃᑦᑎᐊᕈᑎᒋᔭᖏᓐᓂᒃ. ᑲᔪᓯᓂᖃᑦᑎᐊᕐᓂᖅ ᑐᑭᖃᕈᓐᓇᕐᒪᑦ ᐃᓕᓐᓂᐊᒃᑲᓐᓂᕐᓗᓂ ᐱᓕᒻᒪᒃᓴᕈᑎᒃᑲᓐᓂᕐᓂᒃ ᐊᒻᒪᓗ ᐃᓕᓴᕕᒻᒥ ᐃᓕᓐᓂᐊᕆᐊᓯᓗᑎᑦ, ᖁᑦᑎᓐᓂᖅᓴᒥᒃ ᐊᔪᙱᓐᓂᖃᕆᐊᓕᖕᓄᑦ ᐃᖅᑲᓇᐃᔮᖅᑖᕐᓗᑎᑦ, ᐅᕝᕙᓘᓐᓃᑦ ᐃᓚᐅᖃᑕᐅᑦᑎᐊᕐᓂᖅᓴᐅᓕᕐᓗᑎᑦ ᐊᒻᒪᓗ ᖃᓄᐃᙱᑦᑐᒃᑯᑦ ᐃᓚᐅᖃᑕᐅᖃᑦᑕᓕᕐᓗᑎᑦ ᐃᓚᒥᓂᒃ ᐊᒻᒪᓗ ᓄᓇᓕᒻᒥ ᐃᓅᓯᕆᔭᐅᔪᒥᒃ.