ᐱᓕᕆᐊᑦ ᐃᓕᓐᓂᐊᕋᒃᓴᑦ ᓇᓗᓇᐃᒃᑯᓯᖅᑕᐅᓯᒪᓂᖏᑦ
ᐃᓕᑕᖅᓯᓂᑉ ᐃᓄᐃᑦ ᖃᓄᐃᖅᑑᕈᓐᓇᕐᓂᖏᑦᑕ ᐱᓕᕆᐊᖏᑦ ᐊᐅᓚᑦᑎᓲᑦ ᐱᐅᔪᓂᒃ, ᑕᒪᐃᓐᓂ ᐱᖃᓯᐅᔾᔨᓪᓗᑎᑦ ᐃᓕᓐᓂᐊᕈᑎᒋᔭᒃᓴᓂᑦ ᑐᕌᖓᔪᑦ ᐅᓪᓗᒥᐅᔪᖅ ᐃᓄᖕᓄᑦ. ᐱᕙᓪᓕᐊᓂᖃᕐᓗᑎᑦ ᐃᓄᐃᑦ ᓱᓕᔫᔪᓂᑦ ᖃᐅᔨᒪᐃᓐᓇᖅᑕᒥᓂᒃ, ᐱᓕᕆᐊᕗᑦ ᐃᓕᓐᓂᐊᕋᒃᓴᑦ ᐊᑐᓕᖅᑎᑦᑎᓂᖃᖅᑐᑦ ᐱᖅᑯᓯᑐᖃᖅᑎᒍᑦ ᐊᔪᙱᓐᓂᕆᔭᐅᔪᓂᑦ ᐅᓪᓗᒥᒧᑦ ᐃᓅᓯᐅᓕᖅᑐᒧᑦ ᐊᒻᒪᓗ ᐱᓕᕆᐊᖃᕈᒪᓕᖅᑎᑦᑎᔪᑦ ᐃᓄᖕᓂᒃ ᓴᙱᔪᒃᑯᑦ ᐃᓚᐅᖃᑕᐅᖃᑦᑕᓕᕐᓗᑎᑦ ᐱᕙᓪᓕᐊᓂᖃᖅᑐᒥᒃ ᐊᓯᔾᔨᖅᐸᓪᓕᐊᔪᒥᒃ ᐃᓅᓯᕐᒥᒃ. ᐅᐱᒍᓱᓐᓂᖅ ᐃᓕᖅᑯᓯᑦᑎᓐᓂ ᐊᒻᒪᓗ ᑭᓇᐅᓂᑦᑎᓐᓂ ᑐᙵᕕᒋᔭᐅᓪᓗᐊᖅᑐᖅ ᐃᓕᑕᖅᓯᓂᑉ ᐱᓕᕆᐊᖏᖕᓂᒃ.
ᑕᒪᐃᓐᓂ ᐃᓕᓐᓂᐊᕋᒃᓴᑦ ᐊᓯᔾᔨᖅᑕᐅᓯᒪᕗᑦ ᐱᔭᕆᐊᓕᖏᑦ ᓄᓇᓖᑦ ᒪᓕᑦᑐᒋᑦ ᐊᒻᒪᓗ ᐊᐅᓚᑕᐅᓲᑦ ᐱᓕᕆᖃᑎᒋᔭᐅᓪᓗᑎᑦ ᐊᔾᔨᒌᙱᑦᑐᑦ ᐱᓕᕆᖃᑎᖃᕈᒪᐃᓐᓇᖅᑐᑦ ᑮᓇᐅᔭᖃᖅᑎᑦᑎᔩᑦ ᐊᒻᒪᓗ ᓄᓇᓕᒻᒥᐅᑦ ᓯᕗᓕᖅᑎᖏᑦ.
ᐱᓕᕆᐊᑦ ᐃᓕᓐᓂᐊᕋᒃᓴᑦ ᖃᓄᐃᑦᑑᓂᖏᑦ
ᐊᖅᑯᓯᐅᕐᓂᖅ ᐃᓄᐃᑦ ᐱᓕᕆᐊᖃᕈᒪᓕᕐᓂᖏᖕᓄᑦ
ᐱᓕᕆᐊᑦ ᖃᐅᔨᒪᓂᖅᓴᐅᓕᖅᑎᑦᑎᓂᖃᖅᑐᑦ ᐊᒻᒪᓗ ᖁᔭᒋᔭᖃᓕᖅᑎᑦᑎᔪᑦ ᐃᓄᐃᑦ ᐊᑐᖃᑦᑕᕐᓂᑯᒥᓂᖏᓐᓂᒃ ᐃᓕᓐᓂᐊᖅᓯᓐᓈᑦ ᒪᑭᑎᒃᑲᓐᓂᒻᒪᕆᓪᓗᒍ ᐃᓄᐃᑦ ᐃᓕᖅᑯᓯᖓ.
ᐃᓕᓐᓂᐊᓕᓵᕐᓂᖅ ᐊᒻᒪᓗ ᐱᓕᕆᐊᖃᖃᑕᐅᑦᑎᐊᖅᑐᑦ ᒥᐊᓂᖅᓯᔩᑦ
ᐊᔾᔨᒌᙱᑦᑐᑦ ᐱᓕᕆᐊᕆᔭᐅᑎᑦᑎᒍᑏᑦ ᐃᓄᖕᓄᑦ ᓱᕈᓯᕐᓄᑦ, ᒪᒃᑯᑦᑐᓄᑦ, ᐊᖓᔪᖅᑳᕆᔭᐅᔪᓄᑦ ᐊᒻᒪᓗ ᒥᐊᓂᖅᓯᔨᓄᑦ ᐃᑲᔪᖅᑐᐃᔪᑦ ᐊᔪᕈᓐᓃᖅᓴᖅᑎᓪᓗᒋᑦ ᐊᒻᒪᓗ ᐃᓄᐃᑦ ᐃᓕᖅᑯᓯᑦᑎᐊᕚᓗᖏᓐᓂᒃ ᐱᒻᒪᕆᒋᔭᖏᓐᓂᒃ.
ᓄᓇᒧᑦ ᐊᐅᓪᓚᕐᓗᓂ ᐱᓕᕆᐊᑦ
ᓇᓗᓇᕈᓐᓃᖅᓯᒪᓪᓗᓂ ᑲᔪᓯᓂᖃᖅᑎᑦᑎᐊᖅᓯᒪᔭᑦᑎᓐᓄᑦ ᓄᓇᑐᐃᓐᓇᕐᒧᑦ ᐊᐅᓪᓚᕐᓗᓂ ᐱᓕᕆᐊᑦ ᐅᐸᓗᖓᐃᔭᐃᑎᑦᑎᔪᑦ ᐃᓕᓐᓂᐊᖅᑎᓂᑦ ᐊᓐᓇᐅᒪᓂᕐᒥᒃ ᐊᒻᒪᓗ ᔭᒐᔾᔭᐃᓂᕐᒥᒃ ᐅᑭᐅᖅᑕᖅᑐᒥ ᐊᕐᕌᒍᒥ ᓯᓚᖓ ᖃᓄᐃᑦᑑᒐᓗᐊᖅᐸᑦ
ᓂᕿᓕᕆᓂᕐᒥᒃ ᐊᒻᒪᓗ ᐊᖑᓇᓱᓐᓂᕐᒥᒃ ᐱᓕᕆᐊᑦ
ᐃᓕᓐᓂᐊᖅᑎᑦᑎᓲᖑᔪᒍᑦ ᑭᖑᓪᓕᐅᔪᓂᑦ ᑭᖑᕚᓂᑦ ᐃᓄᐃᑦ ᐊᖑᓇᓱᓐᓂᕐᒧᑦ ᐃᓕᖅᑯᓯᕐᒥᒃ ᑐᙵᕕᓖᑦ ᐊᑐᓲᖏᑦ ᓂᕿᒃᓴᖅᓯᐅᕐᓗᓂ ᐊᒻᒪᓗ ᐸᐸᑦᑎᓗᓂ ᓂᕿᓂᑦ ᐊᑦᑕᓇᙱᑦᑐᒃᑯᑦ ᐊᒻᒪᓗ ᒪᑭᒪᓇᖅᑐᒃᑯᑦ.
ᒥᖅᓱᕐᓂᖅ ᐊᒻᒪᓗ ᐃᓕᖅᑯᓯᓕᕆᓂᖅ
ᐱᓕᕆᐊᑦ ᐅᐸᓗᖓᐃᔭᐃᔪᑦ, ᐋᖅᑭᒃᓱᐃᔪᑦ ᐊᒻᒪᓗ ᓴᓇᑎᑦᑎᔪᑦ ᐊᓐᓄᕌᓂᑦ ᐃᓚᒌᑦ ᓄᓇᓖᓪᓗ ᐊᑦᑕᓇᙱᑦᑐᒦᖁᓪᓗᒋᑦ, ᐅᖅᑰᖁᓪᓗᒋᑦ ᐊᒻᒪᓗ ᑕᑯᒥᓇᖅᑐᓂᑦ ᐊᑐᕐᓗᑎᑦ ᐊᕐᕌᒍᓕᒫᕐᒥ ᓯᓚ ᖃᓄᐃᑦᑑᒐᓗᐊᖅᐸᑦ, ᐊᒻᒪᓗ ᐃᓚᐅᖃᑕᐅᖁᓪᓗᒋᑦ ᓴᓇᔪᒪᔭᒥᓂᒃ ᖃᓄᖅᑑᖅᓯᒪᓗᑎᑦ ᐊᒻᒪᓗ ᓴᓇᔪᓐᓇᖅᑕᐅᔪᓂᑦ ᐱᐅᔪᒡᒍᑎᓂᑦ ᖃᓄᐃᓕᐅᖅᑎᑦᑎᓂᖃᕐᓗᑎᑦ.
ᐃᖅᑲᓇᐃᔭᕐᓂᕐᒧᑦ ᐅᐸᓗᖓᐃᖅᓯᒪᓂᖅ, ᐃᖅᑲᓇᐃᔭᕐᓂᖅ ᐊᒻᒪᓗ ᐱᕙᓪᓕᐊᓂᖅ ᑮᓇᐅᔭᓕᐅᕐᓗᓂ
ᑕᐃᒃᑯᐊ ᐱᕙᓪᓕᐊᓂᖃᓕᖅᑐᑦ ᐃᖅᑲᓇᐃᔭᕈᒪᓕᖅᑐᑎᑦ, ᐃᖅᑲᓇᐃᔭᕐᓂᕐᒧᑦ ᐅᐸᓗᖓᐃᖅᓯᒪᓂᕐᒥᒃ ᐃᓕᓐᓂᐊᖅᑎᑦᑎᓲᖑᕗᒍᑦ, ᐃᖅᑲᓇᐃᔭᕐᓂᕐᒧᑦ ᐊᔪᕈᓐᓃᖅᑎᑦᑎᓂᖃᓲᖑᓪᓗᑕ ᐊᒻᒪᓗ ᑲᔪᖏᖅᓴᐃᕙᑦᑐᑕ ᖃᓄᐃᓕᐅᕈᓐᓇᕆᐊᖃᕐᒪᖔᖅ ᐱᒋᐊᕐᓗᓂ ᓇᖕᒥᓂᖁᑎᒋᔭᐅᔪᒥᒃ.
ᑭᓱᒥᒃ ᐱᔭᕆᐊᖃᕋᕕᑦ?
ᐱᓕᕆᐊᕗᑦ ᐋᖅᑭᒃᓱᓲᕆᔭᕗᑦ ᒪᓕᑦᑐᒋᑦ ᓄᓇᓖᑦ ᐱᔭᕆᐊᓕᖏᑦ: ᐊᑯᓂᐅᓂᖏᑎᒍᑦ, ᐊᒥᓲᓂᖏᑎᒍᑦ ᐃᓕᓐᓂᐊᖅᑏᑦ, ᐊᒻᒪᓗ ᖃᓄᐃᑦᑑᓂᖏᑦ ᐃᓄᐃᑦ ᐱᔪᒪᔪᑦ. ᖃᐅᔨᒃᑲᕐᓗᑎᒍᑦ ᐃᓕᓐᓂᐊᕋᒃᓴᑦᑎᓐᓂ ᓄᓇᓕᔅᓯᓐᓄᐊᖁᔨᒍᔅᓯ ᐅᕝᕙᓘᓐᓃᑦ ᐱᓕᕆᐊᑦᑎᓐᓂ, ᐊᒻᒪᓗ ᐃᖅᑲᓇᐃᔭᖃᑎᒋᒐᔭᖅᐸᑦᑎᒋᑦ ᑕᒪᓐᓇ ᐊᔪᕐᓇᕈᓐᓃᕋᔭᕐᒪᑦ!