ᐃᓕᓐᓂᐊᓕᓵᖅᑐᓕᕆᓂᖅ ᐊᒻᒪᓗ ᐃᓚᒋᔭᐅᖃᑕᐅᓗᓂ ᐸᖅᑭᓂᖅ

ᐱᐅᔪᖅ ᐱᓕᕆᐊᖅ (ᓇᔾᔨᔪᓄᑦ ᐊᒻᒪᓗ ᐊᓈᓇᕈᕋᑖᖅᑐᓄᑦ ᐃᓕᓐᓂᐊᕋᒃᓴᖅ)

ᑖᓐᓇ ᐱᓕᕆᐊᖅ ᐋᖅᑭᓱᖅᑕᐅᓯᒪᔪᖅ ᐃᓕᓐᓂᐊᖅᑕᐅᓂᖃᕋᒥ ᓇᔾᔨᔪᓄᑦ ᐃᕐᓂᓂᐊᓕᖅᑐᓄᑦ ᐊᒻᒪᓗ ᐊᓈᓇᒋᔭᐅᔪᓄᑦ ᐃᓅᕋᑖᕐᓄᑦ/ᐱᐊᕋᕐᓄᑦ. ᐃᓕᓐᓂᐊᑎᑦᑎᒍᑕᐅᔪᖅ ᐃᓄᙳᐃᓂᕐᒥᒃ, ᓇᔾᔨᔪᑦ ᐃᕐᓂᕋᑖᓪᓗ ᓂᕆᑦᑎᐊᖃᑦᑕᕐᓂᖏᑦ, ᐃᓅᕋᑖᓂᑦ ᐸᖅᑭᓂᕐᒥᒃ, ᐱᖅᑯᓯᑐᖃᖅᑎᒍᑦ ᕿᑐᕐᖓᓂᑦ ᐱᕈᖅᓴᐃᑎᑦᑎᒍᓰᑦ, ᒥᖅᓱᕐᓂᕐᒥᒃ ᐊᒻᒪᓗ ᓂᖅᑎᐅᕐᓂᕐᒥᒃ ᐸᖅᑭᖁᓪᓗᒋᑦ ᐊᒻᒪᓗ ᖃᑕᙳᑎᒥᓄᑦ ᐱᑎᑦᑎᒍᓐᓇᖃᑦᑕᕐᓂᕐᒥᒃ. ᓄᑖᑦ ᐊᓈᓇᒋᔭᐅᔪᑦ ᐃᓕᓐᓂᐊᕋᔭᖅᑐᑦ ᓂᖅᑎᐅᕐᓂᕐᒥᒃ ᖃᑕᙳᑎᒥᓂᒃ ᓂᕆᑎᑦᑎᖃᑦᑕᕐᓂᐊᕋᒥᒃ ᐊᒻᒪᓗ ᒥᖅᓱᕆᐅᖅᓴᑎᑕᐅᓪᓗᑎᑦ ᐊᒪᐅᓯᐅᕐᓂᐊᕐᒪᑕ ᐱᐊᕋᖏᑦ ᐊᒻᒪᓗ ᐊᓈᓇᒋᔭᐅᔪᖅ ᐅᖅᑰᖃᑦᑕᕐᓂᐊᕐᒪᑕ ᓂᓪᓚᓱᒃᑳᓗᒻᒥ ᐅᑭᐅᕐᒥ.

10-15 ᐅᓪᓗᐃᑦ
6-10 ᐃᓕᓐᓂᐊᖅᑏᑦ
ᒪᑐᐃᖓᔪᖅ ᐊᓈᓇᕈᓛᓕᖅᑐᓄᑦ ᐅᕝᕙᓘᓐᓃᑦ ᕿᑐᕐᖓᖅᑖᕋᑖᖅᑐᒥᓂᕐᓄᑦ
ᐊᑐᐃᓐᓇᐅᒪᔪᖅ ᖃᖓᓕᒫᒃᑯᑦ ᐊᕐᕌᒍᒥ

ᐃᓕᑕᖅᓯᓂᖅ ᐃᓅᕋᑖᖅᑐᒥᓂᖁᑎᓖᑦ ᐃᓕᓐᓂᐊᖅᑎᑕᐅᓂᖏᑦ

ᐊᖏᕐᕋᒧᑦ ᐳᓛᕆᐊᖃᑦᑕᖅᑐᑦ ᐊᒻᒪᓗ ᐋᓐᓂᐊᖅᑕᐃᓕᒪᓂᕐᒧᑦ ᐊᔭᐅᕆᓂᕐᒥᒃ ᐱᓕᕆᐊᖅ ᐊᖓᔪᖅᑳᕆᔭᐅᔪᓄᑦ ᐊᒻᒪᓗ ᒥᐊᓂᖅᓯᔨᓄᑦ ᓄᓇᓕᓐᓂ ᐃᓅᕋᑖᖅᑐᖁᑎᓕᓐᓄᑦ ᐅᑭᐅᓖᑦ 0-2. ᐅᓪᓗᒥᐅᔪᖅ ᐊᑐᐃᓐᓇᐅᒪᑎᑕᐅᔪᖅ ᐊᕐᕕᐊᓂ ᐊᒻᒪᓗ ᑲᖏᖅᖠᓂᕐᒥ ᐊᒻᒪᓗ ᓇᐅᔮᕐᓂ ᐊᑐᐃᓐᓇᐅᒪᑎᑕᐅᓛᖅᑐᖅ ᐅᑭᐊᒃᓵᖅ 2023-ᖑᓕᖅᐸᑦ. .ᐃᓕᕆᐊᖅ ᐱᖃᓯᐅᔾᔨᒻᒥᔪᖅ ᑲᑎᑎᑦᑎᓲᖑᓪᓗᑎᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᖃᓄᐃᓕᐅᖅᑎᑦᑎᕈᓘᔭᖃᑦᑕᖅᑐᑎᑦ ᒥᐊᓂᖅᓯᔨᓂᑦ.

ᐃᓅᕋᑖᖅᑐᒥᓂᖁᑎᓖᑦ ᐱᓕᕆᐊᖓ ᖃᓄᖅᑑᕈᑎᒋᔭᐅᓯᒪᕗᖅ, ᖃᐅᔨᓵᒥᓃᑦ ᖃᐅᔨᔭᒥᓂᐅᔪᓂᑦ ᒪᓕᑦᑐᑎᑦ ᐱᓕᕆᐊᖅ ᐋᖅᑭᓱᖅᑕᐅᓯᒪᔪᖅ ᐃᑉᐱᒍᓱᑦᑎᐊᖅᑐᓂ ᓄᓇᖃᖅᑳᖅᓯᒪᔪᓂᑦ ᐊᖓᔪᖅᑳᕆᔭᐅᔪᓂᑦ ᕿᑐᕐᖓᓕᓐᓂᑦ ᕿᑐᕐᖓᖏᑕ ᓯᕗᓪᓕᖅᐹᕆᔭᐅᒻᒪᑕ ᐱᐅᓛᖑᓪᓗᑎᓪᓗ ᐃᓕᓴᐃᔨᐅᓗᑎᑦ. ᓴᙱᔪᑦ ᓄᓇᖃᖅᑳᖅᓯᒪᔪᑦ ᐃᓚᒌᑦ, ᐊᖏᕐᕋᖏᑦ ᓄᓇᓕᖏᓪᓗ ᐋᓐᓂᐊᖅᑕᐃᓕᒪᑎᑦᑎᓂᖃᓲᑦ ᓄᑕᖅᑲᑉ ᐱᕙᓪᓕᐊᓂᖓᓂᒃ, ᓴᐳᔾᔨᓯᒪᓪᓗᑎᑦ ᐃᓕᖅᑯᓯᕐᒧᑦ ᑭᓇᐅᓂᖏᑦ ᐊᒻᒪᓗ ᖃᐅᔨᒪᓇᑦᑎᐊᖅᑎᑦᑎᓲᑦ ᐊᑯᓂᐅᔪᒧᑦ ᖃᓄᐃᑦᑕᐃᓕᒪᑎᑦᑎᓂᖃᕋᓱᐊᓲᖑᓪᓗᓂ.

ᑖᓐᓇ ᐱᓕᕆᐊᖅ ᐊᖓᔪᖅᑳᕆᔭᐅᔪᓂᑦ ᕿᑐᕐᖓᓕᓐᓂᑦ ᐊᒻᒪᓗ ᒥᐊᓂᖅᓯᔨᓂᑦ ᐊᑐᕈᓐᓇᖅᑕᒥᓂᒃ ᐊᑐᐃᓐᓇᐅᒪᑎᑦᑎᓲᖅ ᐊᒻᒪᓗ ᐃᑲᔪᖅᑐᐃᔾᔪᑎᓂᑦ ᒪᑭᑉᐹᓪᓕᓕᖁᓪᓗᒋᑦ ᐃᓚᒌᑦ ᑲᑎᖅᓱᖅᑕᐅᓪᓗᑎᑦ ᓄᓇᖃᖅᑳᖅᓯᒪᔪᓄᑦ ᓯᕗᒃᑲᖅᑕᕈᑕᐅᔪᑦ ᓄᓇᓕᓐᓂ ᖃᓄᖅᑑᕈᑕᐅᓯᒪᔪᑦ ᐊᒻᒪᓗ ᓯᕗᓪᓕᐅᓪᓗᑎᑦ ᖃᐅᔨᓵᒥᓂᕐᓂᑦ ᖃᐅᔨᔭᒥᓃᑦ ᐊᑐᖅᑕᒥᓂᐅᓂᖏᖕᓄᑦ ᐃᓕᓐᓂᐊᓕᓵᖅᑐᓕᕆᓂᕐᒨᖓᔪᑦ ᐃᓕᑕᖅᓯᓂᖅ ᐱᓕᒻᒪᒃᓴᐃᑎᑦᑎᓲᖅ ᐊᒻᒪᓗ ᐱᓕᕆᔨᒻᒪᕆᓐᓂᒃ ᐱᕙᓪᓕᐊᓂᖃᖅᑎᑦᑎᓪᓗᓂ ᐃᓕᓐᓂᐊᓕᓵᖅᑐᓂᑦ ᐃᖅᑲᓇᐃᔭᖅᑎᓄᑦ ᐃᖅᑲᓇᐃᔭᖅᑎᑖᕆᔭᐅᓯᒪᔪᑦ ᐊᐅᓚᑦᑎᖁᓪᓗᒋᑦ ᐱᓕᕆᐊᕐᒥ.

ᓇᒡᒐᔾᔭᐅ−ᐅᓪᓗᕈᓗᑐᐃᓐᓇᖅ
15 ᐃᓚᒌᑦ ᐊᑕᐅᓯᕐᒧᑦ ᕿᑐᕐᖓᖅᑖᕋᑖᖅᑐᒥᓂᖁᑎᓕᓐᓄᑦ ᐳᓛᕆᐊᖅᑐᓄᑦ
ᒪᑐᐃᖓᔪᖅ ᐃᓚᒌᓄᑦ ᓱᕈᓯᓖᑦ ᑐᖔᓂ ᐅᑭᐅᓖᑦ 2-ᓂᑦ.
ᐊᑐᐃᓐᓇᐅᒪᔪᖅ ᖃᖓᓕᒫᒃᑯᑦ ᐊᕐᕌᒍᒥ

ᐱᙳᐊᖅᑕ − ᐃᓕᓐᓂᐊᓕᓵᖅᑐᓄᑦ ᐱᓕᕆᐊᖅ

ᑐᕌᖓᔪᖅ ᓱᕈᓯᕐᓄᑦ 0-6 ᐊᒻᒪᓗ ᒥᐊᓂᖅᓯᔨᖏᑦ, ᐃᓕᓐᓂᐊᖅᑎᑕᐅᓲᑦ ᓇᒻᒥᓂᖅ ᑭᓇᐅᒻᒪᖔᕐᒥᒃ ᖃᐅᔨᖁᓪᓗᒋᑦ ᐊᒻᒪᓗ ᐱᙳᐊᕐᓂᒃᑯᑦ ᓇᓪᓕᒍᓱᑦᑐᒃᑯᑦ ᐃᑲᔪᖅᑐᐃᓂᖃᖅᑐᓂ ᐊᒻᒪᓗ ᐃᓚᐅᖃᑕᐅᓪᓗᑎᑦ ᐸᖅᑭᔩᑦ. ᐱᓕᕆᐊᖅ ᑲᑎᑎᑦᑎᓯᒪᔪᖅ ᐃᓕᓐᓂᐊᖅᑎᑦᑎᒍᓯᖏᓐᓂᒃ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᒪᓐᑎᔅᓱᕆ ᐱᕈᖅᑎᑕᐅᖁᓪᓗᒋᑦ ᐃᓚᒌᑦ ᖃᓄᐃᑦᑕᐃᓕᒪᓂᖏᑦ ᐊᒻᒪᓗ ᐃᓚᒌᑦ ᓴᙵᑦᑎᑕᐅᖁᓪᓗᒋᑦ. ᐃᓐᓇᒻᒪᕆᖃᖅᑐᑦ ᐊᒻᒪᓗ ᓄᓇᓕᓐᓂ ᑲᒪᔨ ᑐᒧᐊᑦᑎᑦᑎᖃᑦᑕᕋᔭᖅᑐᓂᑦ ᐱᓕᕆᐊᕐᒥ.

ᓇᒡᒐᔾᔭᐅ−ᐅᓪᓗᕈᓗᑐᐃᓐᓇᖅ
25 ᐃᓕᓐᓂᐊᖅᑏᑦ
ᒪᑐᐃᖓᔪᖅ ᑕᒪᐃᓐᓄᑦ ᐸᖅᑭᔨᓄᑦ ᕿᑐᕐᖓᓖᑦ ᑐᖔᓂ 0−6-ᓂᑦ.
ᐊᑐᐃᓐᓇᐅᒪᔪᖅ ᓯᑏᕝᕙᒥ ᔫᓂᒧᑦ

ᐃᓄᒃᑎᑖᖅᑕ (ᐃᓄᒃᑎᑐᑦ ᐃᓕᓐᓂᐊᖅᑕᐅᑲᐃᓐᓇᕈᓐᓇᖅᑐᖅ ᐱᓕᕆᐊᖅ)

ᑖᓐᓇ ᐅᓪᓗᒃᑯᑦ ᐃᓕᓐᓂᐊᖅᑕᐅᑲᐃᓐᓇᖃᑦᑕᓲᖅ ᐋᖅᑭᓱᖅᑕᐅᓯᒪᔪᖅ ᐃᓕᓐᓂᐊᕆᐊᓲᕐᓄᑦ ᓄᑕᖅᑲᓄᑦ ᐃᓕᓐᓂᐊᖅᑎᑦᑎᓲᖑᓪᓗᑎᑦ ᐊᑐᕐᔫᒥᑎᑦᑎᓇᓱᐊᓲᓪᓗ ᐃᓄᒃᑎᑐᑦ ᐅᖃᐅᓯᖓᓂᒃ ᐊᒻᒪᓗ ᐅᖃᓕᒫᕆᐅᖅᓴᓂᕐᒥᒃ. ᓱᕈᓰᑦ ᐃᓚᐅᖃᑕᐅᓲᑦ ᐃᓕᖅᑯᓯᓕᕆᓂᕐᒥᒃ ᖃᓄᐃᓕᐅᕈᑎᒋᔭᐅᔪᓂᑦ ᐊᒻᒪᓗ ᐃᖅᑲᓇᐃᔭᖃᑎᖃᓲᑦ ᖃᐃᖁᔭᐅᓯᒪᔪᓄᑦ ᐃᓕᓴᐃᔨᓄᑦ ᐃᑲᔪᖅᑕᐅᓂᐊᕐᒪᑕ ᐅᖃᐅᓯᕐᒥᒃ ᐊᑐᖃᑦᑕᕐᓗᑎᑦ ᐊᑑᑎᖃᑦᑎᐊᖅᑐᒃᑯᑦ. ᑐᑭᒧᐊᑦᑎᑕᐅᓪᓗᑎᑦ ᐃᓕᑕᖅᓯᓂᑉ ᐃᖅᑲᓇᐃᔭᖅᑎᖏᓐᓄᑦ, ᒪᒃᑯᑦᑐᑦ ᓯᕗᓕᖅᑎᐅᑎᑕᐅᓲᑦ ᐃᓕᓐᓂᐊᕋᒃᓴᒥ ᐊᒻᒪᓗ ᐃᔾᔪᐊᕈᒥᓇᖅᑑᑎᑕᐅᓪᓗᑎᑦ ᐃᓄᒃᑎᑑᖅᑐᑎᑦ. ᐃᓕᓐᓂᐊᕐᓇᐅᙱᑲᐃᓐᓇᖅᑎᓪᓗᒍ ᒪᑐᐃᖓᖃᑦᑕᓲᖅ.

4-6 ᐱᓇᓱᐊᕈᓰᑦ
ᓱᕈᓰᑦ ᒥᑭᔫᑕᐅᓂᖅᐹᓃᑦᑐᑦ ᑎᑭᑦᑐᒋᑦ ᖁᑦᑎᓐᓂᓖᖅ 6
ᐊᐅᔭᒃᑯᑦ ᐊᒻᒪᓗ ᐅᑭᐅᒃᑯᑦ ᐃᓕᓐᓂᐊᖅᑐᖃᓲᖅ ᐃᓕᓐᓂᐊᙱᑲᐃᓐᓇᖅᑎᓪᓗᒋᑦ

ᐃᓕᓐᓂᐊᕇᖅᑐᓄᑦ ᐊᒻᒪᓗ ᐅᓐᓄᒃᑯᑦ ᐱᓕᕆᐊᖅ

ᑖᓐᓇ ᐱᓕᕆᐊᖅ ᐃᑲᔪᖅᑐᖅᑕᐅᔭᕆᐊᖃᕐᓂᐅᔪᓂᑦ ᐃᑲᔪᖅᑐᐃᔪᖅ ᐃᓕᓐᓂᐊᖅᑎᓄᑦ ᖁᑦᑎᓐᓂᓖᑦ ᒥᑭᔫᑕᐅᓂᖅᐹᓂᑦ−ᖁᑦᑎᓐᓂᓖᖅ 6-ᓄᑦ ᐊᒻᒪᓗ ᒪᒃᑯᓐᓂᖅᓴᐅᔪᓂᑦ ᐃᓐᓇᓵᕐᓄᑦ ᐊᒻᒪᓗ ᖁᑦᑎᓂᖅᐹᒥ ᐃᓕᓴᕕᒻᒥ ᐃᓕᓐᓂᐊᖅᑐᓄᑦ ᐅᖃᓕᒫᕆᐅᖅᓴᓂᕐᒥᒃ ᐊᒻᒪᓗ ᐱᐅᔪᒃᑯᑦ ᐃᓅᖃᑎᖃᑦᑎᐊᖃᑦᑕᕐᓂᒃᑯᑦ ᐱᓕᕆᐊᖃᕈᑎᖃᓗᐊᖅᑐᓂ. ᒪᒃᑯᒃᑐᑦ ᐱᓕᕆᐊᕐᒥ ᓯᕗᓕᖅᑎᐅᑎᑕᐅᓲᖑᕗᑦ ᐊᒻᒪᓗ ᒪᒃᑯᓐᓂᖅᓴᓂᑦ ᑲᔪᖏᖅᓱᐃᔨᖃᐅᖅᑐᑎᑦ ᑐᑭᒧᐊᑦᑎᑕᐅᓪᓗᑎᑦ ᐃᓕᑕᖅᓯᓂᖅ ᐃᖅᑲᓇᐃᔭᖅᑎᖏᓐᓄᑦ.

ᓱᕈᓰᑦ ᒪᒃᑯᑦᑐᓪᓗ ᐊᑐᐃᓐᓇᐅᒪᕕᐅᓲᖑᕗᑦ ᐅᖅᑰᓇᖅᑐᒥᒃ, ᑭᒃᑯᓕᒫᑦ ᐱᖃᓯᐅᔾᔭᐅᓪᓗᑎᑦ ᐊᑦᑕᓇᙱᑦᑐᒥᓪᓗ ᐃᓂᒃᓴᒥᒃ ᐃᓚᐅᖃᑕᐅᖁᓪᓗᒋᑦ ᓴᓇᙳᐊᓂᕐᕐᒥᒃ, ᐱᙳᐊᕐᓗᑎᑦ ᐅᓪᓗᒥᓕᓴᕐᓂᒃ ᐱᖅᑯᓯᑐᖃᕐᓂᓗ ᐱᙳᐊᓂᑦ ᐊᑐᖅᑎᑕᐅᓪᓗᑎᑦ, ᖁᕕᐊᒋᔭᖃᕈᓐᓇᕐᓗᑎᑦ ᐅᖃᓕᒫᕆᐅᖅᓴᓂᕐᒧᑦ ᖃᓄᐃᓕᐅᕈᑎᒃᓴᓂᒃ ᐊᒻᒪᓗ ᐱᒻᒪᕆᐅᓛᖑᔪᕐᓕ ᐃᓱᒪᒃᓱᕐᓗᑎᑦ ᓱᕈᓯᐅᒍᓐᓇᓂᕐᒥᓂᒃ. ᓂᕿᑦᑎᐊᕙᓂᒃ ᓂᕆᔭᒃᓴᖃᖅᑎᑕᐅᓲᑦ. ᖃᐅᑕᒫᑦ ᐸᕐᓇᒃᑕᐅᓯᒪᔪᓂᑦ ᖃᓄᐃᓕᐅᖅᑎᑕᐅᓲᖑᕗᑦ ᐊᒻᒪᓗ ᐃᓱᒪᖅᓱᕈᓐᓇᖅᑎᑕᐅᑲᐃᓐᓇᕐᒥᓗᑎᑦ ᒪᒃᑯᒃᑐᑦ ᐱᙳᐊᕈᓐᓇᖁᓪᓗᒋᑦ ᐃᓅᖃᑎᒌᒍᓐᓇᖁᓪᓗᒋᓪᓗ. ᑕᒪᓐᓇ ᐱᓕᕆᐊᖅ ᐃᓅᖃᑎᒌᑦᑎᑦᑎᓂᖃᕋᓱᐊᖅᑐᖅ ᐊᒻᒪᓗ ᑲᑐᔾᔨᑎᑦᑎᓂᖃᕋᓱᐊᖅᑐᖅ.

ᐃᓕᓐᓂᐊᕇᖅᑐᑦ ᐱᕕᖃᕐᓂᖏᑦ 3:30−ᒥ ᑎᑭᑦᑐᒍ 6:00 ᐅᓐᓄᒃᑯᑦ ᒪᑐᐃᖓᔪᖅ ᓱᕈᓯᕐᓄᑦ ᒥᑭᔫᑕᐅᓂᖅᐹᓂ ᖁᑦᑎᓐᓂᓕᓐᓄᑦ 6-ᓂᑦ ᐊᒻᒪᓗ ᐱᕕᖃᖅᑎᑕᐅᓂᖏᑦ 6:00−ᒥ ᑎᑭᑦᑐᒍ 8:00−ᒧᑦ ᒪᑐᐃᖓᔪᖅ ᒪᒃᑯᒃᑐᓄᑦ ᐊᑯᕐᖓᖏᖕᓂ ᐃᓕᓐᓂᐊᖅᑐᓄᑦ ᐊᒻᒪᓗ ᖁᑦᑎᓂᖅᐹᒥ ᐃᓕᓐᓂᐊᖅᑐᓄᑦ.

ᓇᒡᒐᔾᔭᐅᒥ−ᐅᓪᓗᕈᓗᑐᐃᓐᓇᕐᒧᑦ
ᓱᕈᓰᑦ ᒥᑭᔫᑕᐅᓂᖅᐹᓃᑦᑐᑦ ᑎᑭᑦᑐᒋᑦ ᖁᑦᑎᓐᓂᓖᑦ 6-ᓄᑦ ᐊᒻᒪᓗ ᐃᓕᓐᓂᐊᖅᑏᑦ ᐊᑯᕐᖓᖏᓐᓂ ᐃᓕᓐᓂᐊᖅᑐᑦ ᐊᒻᒪᓗ ᖁᑦᑎᓂᖅᐹᒥ ᐃᓕᓐᓂᐊᖅᑐᑦ
ᐊᑐᐃᓐᓇᐅᒪᔪᖅ ᐅᑭᐊᒃᓵᖅ, ᐅᑭᐅᖅ ᐊᒻᒪᓗ ᐅᐱᕐᖔᒥ

ᐃᓕᑦᓯᖃᑎᒌᑦ

ᐱᓕᕆᐊᖅ ᐋᖅᑭᓱᖅᑕᐅᓯᒪᔪᑦ ᓱᕈᓰᑦ ᐊᒻᒪᓗ ᐊᖓᔪᖅᑳᖏᑦ/ᓂᖏᐅᒃᑯᖏᑦ/ᐃᔾᔪᐊᕈᒥᓇᖅᑐᖏᑦ ᐱᕕᖃᖅᑎᑕᐅᓗᑎᑦ ᐃᓚᐅᖃᑕᐅᔪᓐᓇᖅᓯᖁᓪᓗᒋᑦ ᐃᓄᐃᑦ ᐃᓕᖅᑯᓯᕐᒥᒃ ᐃᓕᓐᓂᐊᕐᓂᖏᖕᓂᒃ ᐊᒻᒪᓗ ᐊᑐᖅᐸᑦᑕᖏᖕᓂᒃ. ᐋᖅᑭᓱᖅᑕᐅᓯᒪᕗᖅ ᐃᑲᔪᖅᑐᖅᑕᐅᖁᓪᓗᒍ ᐊᖓᔪᖅᑳᕆᔭᐅᔪᑦ ᕿᑐᕐᖓᓖᑦ/ᒥᐊᓂᖅᓯᔩᑦ ᐃᓚᐅᖃᑕᐅᓂᐊᕐᒪᑕ ᐊᒻᒪᓗ ᐸᖅᑭᔨᐅᔪᑦ ᓱᕈᓯᕐᓗ ᐃᓕᓐᓂᐊᖃᑎᒌᓪᓗᑎᑦ ᐊᒻᒪᓗ ᐃᓚᒌᑦᑐᑦ ᑲᑎᙵᓂᖅᓴᐅᓕᖁᓪᓗᒋᑦ. ᐱᓕᕆᐊᖅ ᐃᓕᓐᓂᐊᕋᒃᓴᖅ ᐃᑲᔪᖅᑐᐃᔪᖅ ᐃᓅᖃᑎᒌᑦᑎᐊᕐᓂᕐᒥᒃ, ᓴᙱᔪᒥᒃ ᑲᓱᖅᓯᒪᓂᖃᕐᓗᑎᑦ ᐊᒻᒪᓗ ᐱᐅᔪᒥᒃ ᐊᑐᕐᔫᒥᑎᑕᐅᓇᓱᐊᕐᓗᑎᑦ ᑕᒪᒃᑮᓐᓄᒃ ᐊᖓᔪᖅᑳᕆᔭᐅᔪᖅ/ᒥᐊᓂᖅᓯᔨ ᐊᒻᒪᓗ ᓱᕈᓯᖅ.

ᐃᓚᖓᑦ ᐃᓕᓐᓂᐊᕋᒃᓴᖅ ᐃᓕᓐᓂᐊᖅᑎᓂᑦ ᐱᓕᕆᐊᖃᖅᑎᑦᑎᓂᖃᕐᒥᔪᖅ ᐱᖅᑯᓯᑐᖃᖅᑎᒍᑦ ᖃᓄᐃᓕᐅᕈᑎᒋᔭᐅᓲᕐᓂᑦ ᓲᕐᓗᒃ ᐃᓕᓐᓂᐊᕐᓗᓂ ᖃᓄᖅ ᓄᓗᐊᓕᐅᕈᓐᓇᕐᒪᖔᑕ, ᐅᓗᓂᑦ ᐊᒻᒪᓗ ᐸᓇᓂᑦ (ᐊᐳᑎᒧᑦ ᓴᕖᑦ), ᑲᑭᕙᒃ, ᐊᒻᒪᓗ ᐅᓈᖅ. ᐃᓕᓐᓂᐊᕋᒃᓴᕐᓗ ᐊᐅᓪᓚᑎᑦᑎᓂᖃᕆᕗᖅ ᓲᕐᓗᒃ ᐅᒥᐊᒃᑯᑦ, ᐊᒻᒪᓗ ᓇᑦᑎᖅᓯᐅᕐᓗᑎᑦ, ᐃᓕᓐᓂᐊᖅᑎᑕᐅᓗᑎᓪᓗ ᖁᑭᐅᓯᕆᓂᕐᒧᑦ ᐊᑦᑕᓇᙱᑦᑐᒃᑯᑦ ᐃᓕᓐᓂᐊᕋᒃᓴᒥᒃ ᓇᓗᓇᐃᒃᑯᑕᖅᑖᕐᓗᑎᑦ. ᐊᓯᐊᑦᑕᐅᖅ ᐃᓕᓐᓂᐊᕋᒃᓴᖅ ᐃᓕᓐᓂᐊᖅᑎᑦᑎᓂᖃᕆᕗᖅ ᓴᐸᖓᓕᕆᓂᕐᒥᒃ, ᒥᖅᓱᕐᓂᕐᒥᒃ ᐸᓚᐅᒐᔾᔨᐅᕐᓂᕐᒥᒃ, ᒥᒃᑯᓕᐅᕐᓂᕐᒥᒃ, ᖁᓪᓕᕐᒥᒃ ᐃᑯᒻᒪᒃᓴᐃᒋᐅᖅᓴᓂᕐᒥᒃ, ᐋᑦᑐᕐᓗᑎᑦ, ᐊᒥᓕᕆᓗᑎᑦ, ᐱᓰᑦ ᐃᓕᓐᓂᐊᖅᑕᐅᓗᑎᑦ (ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᙱᐅᓯᖏᑦ ᐊᒻᒪᓗ ᐃᓄᐃᑦ ᓂᕿᖏᓐᓂᒃ ᓂᖅᑎᐅᕐᓂᕐᒥᒃ ᐃᒪᕐᒦᙶᖅᑐᓂᑦ (ᓇᑦᑎᖅ, ᐃᖃᓗᒃ ᐊᓯᖏᓪᓗ).

6 ᐱᓇᓱᐊᕈᓰᑦ ᓄᙳᖏᓐᓂ
6-8 ᐃᓚᒌᑦ: ᓄᑕᖅᑲᑦ ᐊᒻᒪᓗ ᐸᖅᑭᔩᑦ/ᐃᔾᔪᐊᕈᒥᓇᖅᑐᑦ
ᐊᑐᐃᓐᓇᐅᒪᔪᖅ ᖃᖓᓕᒫᒃᑯᑦ ᐊᕐᕌᒍᒥ

ᐃᑲᔪᕐᓂᖅ (ᒪᒃᑯᒃᑐᓄᑦ ᐱᓕᕆᐊᖅ)

ᑖᓐᓇ ᐱᓕᕆᐊᖅ ᐃᓕᓐᓂᐊᒐᒃᓴᖅ ᐃᑲᔪᖅᑐᐃᔪᖅ ᒪᒃᑯᒃᑐᓂᑦ ᐱᕙᓪᓕᐊᓕᖁᓪᓗᒋᑦ ᐊᒻᒪᓗ ᐊᐅᓚᑦᑎᓗᑎᑦ ᐊᑭᓕᖅᓱᖅᑕᐅᙱᑦᑐᒥᒃ ᐱᓕᕆᐊᕐᒥᒃ ᓄᓇᓕᖓᓄᑦ. ᒪᒃᑯᒃᑐᖅ ᐃᓱᒪᒃᓴᖅᓯᐅᕋᔭᖅᑐᖅ ᐃᓱᒪᑖᕐᓗᓂ, ᖃᐅᔨᓴᕐᓗᓂ ᓄᓇᓖᑦ ᑭᙴᒪᒋᔭᖏᖕᓂᑦ, ᖃᐅᔨᓴᕐᓗᓂᒋᑦ ᐱᓕᕆᐊᕆᔪᒪᒻᒪᕆᓲᖏᑦ ᖁᕕᐊᒋᓪᓗᒋᑦ ᐊᒻᒪᓗ ᐊᔪᙱᓐᓂᖏᑦ ᐊᒻᒪᓗ ᐊᐅᓚᑦᑎᓗᓂ/ᐱᓕᕆᐊᖃᖅᑎᑦᑎᓗᓂ ᐱᓕᕆᐊᕐᒧᑦ ᐃᓱᒪᑖᕈᑎᒋᓯᒪᔭᖓᓂᒃ. ᒪᒃᑯᒃᑐᖅ ᐊᔪᕈᓐᓂᖅᓴᓂᐊᖅᑐᖅ ᑐᒃᓯᕋᐅᑎᓕᐅᕐᓂᕐᒥᒃ ᑎᑎᕋᕐᓗᓂ, ᑮᓇᐅᔭᖃᖅᑎᑦᑎᔨᑖᕐᓗᓂ ᐊᒻᒪᓗ ᐃᑲᔪᖅᑐᐃᔨᓂᑦ, ᓇᓂᓯᓗᓂ ᐃᒡᓗᒥᒃ ᐱᓕᕆᐊᖃᕐᕕᐅᒐᔭᖅᑐᒥᒃ ᐅᕝᕙᓘᓐᓃᑦ ᐊᑐᖅᑐᐊᕋᒃᓴᒥᒃ ᐊᐅᓚᑦᑎᖁᓪᓗᒋᑦ ᐱᓕᕆᐊᕐᒥᓂᒃ ᐃᖅᑲᓇᐃᔭᖅᑎᑖᕐᓗᓂ ᐊᒻᒪᓗ ᓴᖅᑭᔮᕐᔫᒥᑎᑦᑎᓗᓂ, ᓄᓇᓕᒻᒥᐅᑦ ᐱᓕᕆᖃᑎᒋᔭᐅᒋᐊᕐᓗᑎᑦ ᐊᒻᒪᓗ ᖃᖓᒃᑯᑦ ᐊᑐᖅᑕᐅᒐᔭᕐᒪᖔᖅ ᐱᓕᕆᐊᖃᖅᐸᓪᓕᐊᓂᖓᓂᒃ ᐋᖅᑭᒃᓱᐃᓗᓂ. ᑖᓐᓇ ᐱᓕᕆᐊᖅ ᒪᒃᑯᑦᑐᓂᑦ ᐱᓕᕆᐊᖃᖃᑕᐅᑎᑦᑎᓇᓱᐊᖅᑐᖅ 120 ᐃᑲᕐᕋᓂᑦ ᐊᑭᓕᖅᓱᖅᑕᐅᙱᓪᓗᑎᑦ ᐃᖅᑲᓇᐃᔭᕐᓗᑎᑦ ᖁᑦᑎᓂᖅᐹᒥ ᓈᓴᐅᑎᑖᕆᐊᖃᕈᑎᓄᑦ ᐃᓚᒋᐊᖅᑕᐅᒍᓐᓇᕋᔭᖅᑐᓂ ᐊᑭᓕᖅᓱᖅᑕᐅᙱᓪᓗᓂ ᐱᓕᕆᑎᓪᓗᒋᑦ.

120 ᐃᑲᕐᕋᑦ ᐊᑭᓕᖅᓱᖅᑕᐅᙱᓪᓗᓂ ᐱᓕᕆᓗᓂ
ᒪᒃᑯᒃᑐᓄᑦ ᐅᑭᐅᓖᑦ 15-30
ᐊᑐᐃᓐᓇᐅᒪᔪᖅ ᖃᖓᓕᒫᒃᑯᑦ ᐊᕐᕌᒍᒥ

ᕼᐊᑭᕐᓂᕐᒧᑦ ᐃᓕᓐᓂᐊᖅᑎᑦᑎᒍᑏᑦ

ᐱᓕᕆᖃᑎᖃᖅᑐᑕ ᑲᖏᖅᖠᓂᕐᒥ ᒥᑭᔫᑎᓂᒃ ᕼᐋᑭᖅᑎᓂᒃ, ᐱᙳᐊᖅᑐᓕᕆᔨ ᐊᒻᒪᓗ ᐊᓯᖏᑦ ᓄᓇᓕᓐᓂ ᕼᐋᑭᖅᑐᓕᕆᔨᐅᔪᑦ, ᐱᓇᓱᐊᕈᓯᓕᒫᒥᒃ ᕼᐋᑭᕐᓂᕐᒥᒃ ᑎᑎᕋᕆᐅᔅᓴᑎᑦᑎᖃᑦᑕᖅᑐᒍᑦ 200-ᓄᑦ ᑎᑭᓪᓗᒍ ᓱᕈᓯᕐᓄᑦ ᐊᒻᒪᓗ ᒪᒃᑯᑦᑐᓄᑦ. ᑖᓐᓇ ᐱᓕᕆᐊᖅ ᐊᐅᓚᓂᖃᕐᒥᔪᖅ ᐊᕐᕕᐊᓂ, ᖃᒪᓂᑦᑐᐊᕐᒥ, ᖁᕐᓗᖅᑐᒥ ᐊᒻᒪᓗ ᐃᖃᓗᓐᓂ. ᑕᖕᒫᖅᓯᒪᕝᕕᖕᒥ ᑐᕌᕆᔭᐅᔪᑦ ᐱᖓᓲᓕᖅᑲᖓᕗᑦ: ᐋᖅᑭᒃᓱᐃᕙᓪᓕᐊᓂᖅ ᓯᕗᓕᖅᑎᐅᓂᕐᒧᑦ ᐊᔪᕈᓐᓃᖅᑕᐅᕙᒃᑐᓂᒃ, ᐱᓗᐊᙳᐊᖅᖢᓂ ᐃᓄᖕᓂᒃ ᐊᖑᑎᓂᒃ ᓄᓇᓕᕋᓛᖃᕐᕕᖕᒥ ᓯᕗᓕᖅᑎᐅᓂᕐᒥᓄᑦ; ᐱᐅᓯᒋᐊᖅᑎᓪᓗᒋᑦ ᐃᓕᓐᓂᐊᖅᑕᐅᔪᒃᓴᑦ ᐊᒻᒪ ᐊᔪᙱᑕᐅᔭᕆᐊᓖᑦ ᑕᒪᐃᓐᓄᑦ ᐃᓕᓐᓂᐊᖃᑕᐅᔪᓄᑦ ᐊᒻᒪ ᒪᒃᑯᒃᑐᑦ ᓯᕗᓕᖅᑎᖏᓐᓄᑦ; ᐊᒻᒪ ᐱᒃᑯᒍᓱᓕᖅᐸᓪᓕᐊᓂᖅ ᖁᓱᔪᓐᓃᖅᑎᑦᑎᓂᕐᓗ ᑕᒪᐃᓐᓄᑦ. ᕼᐋᑭᕐᓂᕐᒧᑦ ᐃᓕᓐᓂᐊᕐᓂᖅ ᑐᕌᒐᖃᖅᑐᖅ ᓯᕗᓕᖅᑎᐅᓂᕐᒥᑦ, ᓇᒻᒥᓂᖅ ᐱᕈᖅᐸᓪᓕᐊᓂᕐᒥᑦ, ᐱᓕᕆᖃᑎᒌᓐᓂᕐᒥᑦ, ᐋᖅᑭᑦᓱᐃᓂᕐᒥᑦ ᑐᕌᒐᕐᓂᑦ ᑲᔪᓯᑎᑦᓯᓂᕐᒥᓪᓗ, ᑐᓴᐅᒪᖃᑦᑕᐅᑎᓂᕐᒧᑦ ᐊᔪᙱᑕᖃᕐᓂᕐᒥᑦ, ᑎᑎᕋᕆᐅᖅᓴᓂᕐᒧᑦ/ᐅᖃᓕᒫᕆᐅᖅᑕᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᕼᐋᑭᕐᓂᕐᒧᓪᓗ ᐊᔪᙱᑕᖃᕐᓂᕐᒥᑦ.

ᑲᖏᖅᖠᓂᕐᒥ ᕼᐊᑭᕐᓂᕐᒧᑦ ᐃᓕᓐᓂᐊᕋᒃᓴᖅ ᐱᓚᐅᖅᓯᒪᒻᒥᔪᖅ 2017−ᒥ ᐅᑭᐅᖅᑕᖅᑐᒥ ᐱᓕᕆᐊᖃᕈᒪᓕᖅᑎᑦᑎᓂᕐᒧᑦ ᐱᔾᔪᓯᐊᕐᒥᒃ ᒪᒃᑯᒃᑐᓄᑦ.

6 ᐅᓪᓗᐃᑦ
ᓱᕈᓯᕐᓄᑦ ᐊᒻᒪᓗ ᒪᒃᑯᑦᑐᓄᑦ ᐅᑭᐅᓖᑦ 5-18
ᐊᑐᐃᓐᓇᐅᒪᔪᖅ ᖃᖓᓕᒫᒃᑯᑦ ᐊᕐᕌᒍᒥ