ᐃᓕᑕᖅᓯᓂᑉ ᐆᑦᑐᕋᖅᑐᑦ ᖃᐅᔨᓇᓱᐊᖅᑐᑎᑦ ᑲᔪᓯᓂᖃᕋᔭᕐᒪᖔᖅ ᑎᓴᒪᓄᑦ ᐅᓪᓗᓄᑦ ᐃᖅᑲᓇᐃᔭᕈᓐᓇᑦᑎᐊᕋᔭᕐᒪᖔᑦ ᐱᓇᓱᐊᕈᓯᕐᒥ

ᐃᓕᑕᖅᓯᓂᖅ, ᒪᓕᑦᑎᐊᖅᑐᓂ ᐃᓄ−ᖃᓄᖅᑑᕈᓐᓇᖅᑐᑦ ᐊᑐᓲᖓᓂᒃ, ᖁᕕᐊᓱᒃᑐᒻᒪᕆᐅᕗᑦ ᑐᓴᖅᑎᑦᑎᔭᕆᐊᒃᓴᖅ ᐆᑦᑐᓛᓕᕐᒥᒻᒪᑕ ᑲᔪᓯᓂᖃᑦᑎᐊᕈᓐᓇᕐᒪᖔᖅ ᖃᐅᔨᓴᕐᓗᑎᑦ  ᐅᓪᓗᓄᑦ ᑎᓴᒪᓄᑦ ᐱᓇᓱᐊᕈᓯᕐᒥ ᒪᐃ 8−ᒥ ᓯᑏᕝᕙ 1−ᒧᑦ, 2023−ᒥ ᐃᖅᑲᓇᐃᔭᖃᑦᑕᕋᔭᕐᓂᖏᖕᓂᑦ ᐃᖅᑲᓇᐃᔭᖅᑎᖏᑦ. ᒫᓐᓇᐅᔪᖅ, ᐃᓕᑕᖅᓯᓂᖅ ᐃᖅᑲᓇᐃᔭᖅᑎᖏᑦ ᐃᖅᑲᓇᐃᔭᕐᓂᐊᖅᑐᑦ ᓯᑕᒪᓂᑦ ᐅᓪᓗᓂᑦ ᑕᓪᓕᒪᓂᑦ ᐱᓇᓱᐊᕈᓯᕐᒥᑦ: ᓇᒡᒐᔾᔭᐅᒥ ᕿᑎᖅᑰᕐᒧᑦ.

ᖃᐅᔨᓴᕈᑕᐅᔪᖅ ᐊᑐᖅᑕᐅᑦᑎᐊᕈᓐᓇᕋᔭᕋᓗᐊᕐᒪᖔᑦ ᐆᑦᑐᕋᐅᑕᐅᓪᓗᓂ ᖃᐅᔨᓴᖅᑕᐅᕐᔪᐊᕐᓂᐊᖅᑐᖅ ᖃᐅᔨᔭᕗᑦ ᐊᒻᒪ ᐊᒃᑐᐃᔾᔪᑎᑦ ᑐᓴᖅᑕᐅᑎᑦᑐᓐᓇᕐᓂᐊᕋᑦᑎᒍᑦ ᑎᒍᒥᐊᖅᑎᐅᓪᓗᐊᖅᑐᓄᑦ.

ᓂᕆᐅᒋᔭᖃᖅᐳᒍᑦ ᑕᒪᑐᒧᖓ ᐆᒃᑑᒪᔭᒍᑕᐅᔪᒧᑦ ᐃᑲᔪᖅᑐᐃᓂᐊᕐᓂᖓᓂᒃ ᐃᖅᑲᓇᐃᔭᖅᑎᑦᑎᓐᓂᒃ ᐃᓚᐅᒃᑲᓐᓂᖁᓪᓗᒋᑦ ᐃᓕᖅᑯᓯᑐᖃᕐᓄᑦ ᐊᑐᖅᐸᒃᑕᖏᓐᓄᑦ, ᑕᐃᒪᐃᓐᓂᖓᓄᓪᓗ ᐃᑲᔪᖅᑐᐃᓗᑎᒃ ᐃᓱᒪᒃᑯᑦ ᖃᓄᐃᙱᑦᑐᓐᓇᕐᓂᖏᓐᓄᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᓪᓗ ᓴᖅᑭᑎᑦᑎᓗᑎᒡᓗ ᐱᐅᓂᖅᓴᒥᒃ ᐃᖅᑲᓇᐃᔭᕐᓂᕐᒥᒃ−ᐃᓅᓯᕐᒥᒃ ᓇᓕᒧᒌᒃᑎᑦᑎᓂᕐᒥᒃ.

ᖁᔭᓐᓇᒦᖑᔪᓯ ᑕᒪᕐᒥᑦᑎᐊᖅ ᐃᖅᑲᓇᐃᔭᖅᑎᒋᔭᕗᑦ ᐱᓇᔪᐃᓐᓇᖅᐸᖕᓂᖏᓐᓄᑦ ᑲᔪᓯᑎᑦᑎᔪᒪᓪᓗᑎᒃ ᐃᓕᓴᖅᓯᓂᖅ ᑕᐅᑐᖅᑰᖅᑕᖓᓂᒃ ᐊᔪᙱᓐᓂᖃᑦᑎᐊᖅᑐᒥᒃ, ᖁᓱᙱᖦᖢᓂ ᓇᖕᒥᓂᕐᓗ−ᐊᔪᙱᑦᑎᐊᖅᑐᓂᒃ ᓄᓇᕗᒻᒥᐅᓂᒃ ᐊᒃᑐᐊᓂᖃᖅᑐᓂᒃ ᐆᒻᒪᑎᒧᑦ ᐃᓄᐃᑦ ᐃᓕᖅᑯᓯᑐᖃᖏᓐᓄᑦ.